గణపురంలో అర్ధరాత్రి మట్టి దందా
విద్యుత్ స్తంభాన్ని ఢీకొట్టిన ట్రాక్టర్
తప్పిన పెను ప్రమాదం.
చర్యలు తీసుకోవాలని కాలనీ వాసులు
స్పాట్ వాయిస్, గణపురం:మండల కేంద్రంలోని గణపసముద్రం చెరువు సాక్షిగా అక్రమ మట్టి రవాణా యథేచ్ఛగా కొనసాగుతోంది. ఆదివారం అర్ధరాత్రి మట్టి మాఫియా గుట్టుచప్పుడు కాకుండా ట్రాక్టర్ల ద్వారా మట్టిని తరలిస్తుండగా తృటిలో పెద్ద ప్రమాదం తప్పింది. అర్ధరాత్రి వేళ గణపసముద్రం చెరువు నుండి మట్టిని తరలిస్తున్న ఒక ట్రాక్టర్ అదుపు తప్పి ప్రధాన రహదారిపై ఉన్న 11 KV విద్యుత్ స్తంభాన్ని బలంగా ఢీకొట్టింది.
ఈ ఘటనలో విద్యుత్ స్తంభం విరిగి ప్రమాదకరంగా వంగిపోయింది. ఆ సమయంలో అక్కడ ఎవరూ లేకపోవడంతో ప్రాణనష్టం తప్పింది, లేనిపక్షంలో పెద్ద ప్రమాదమే జరిగి ఉండేదని స్థానికులు భయాందోళన వ్యక్తం చేస్తున్నారు.
రాజకీయ అండదండలతోనే అక్రమాలు?
కొందరు రాజకీయ నాయకుల అండదండలతోనే ఈ అక్రమ మట్టి దందా మూడు పువ్వులు ఆరు కాయలుగా సాగుతోందని స్థానికులు ఆరోపిస్తున్నారు. అధికారులకు తెలిసినా మామూళ్ల మత్తులో పడి పట్టించుకోవడం లేదని కాలనీ వాసి నాయకపు విశ్వ ప్రసాద్ ఆరోపించారు. అధికారుల పర్యవేక్షణ లోపం వల్లే ఈ అక్రమ రవాణా జరుగుతోంది. రాత్రివేళల్లో అతివేగంగా వెళ్లే ట్రాక్టర్ల వల్ల సామాన్య ప్రజల ప్రాణాలకు ముప్పు పొంచి ఉందని, ఇప్పటికైనా ఉన్నతాధికారులు స్పందించి బాధ్యులపై కఠిన చర్యలు తీసుకోవాలని ఆయనతోపాటు కాలనీ వాసులు డిమాండ్ చేశారు. అక్రమ మట్టి తరలింపును తక్షణమే చర్యలు చేపట్టకపోతే కాలనీ వాసులతో కలిసి ప్రధాన రహదారిపై పెద్ద ఎత్తున ధర్నా నిర్వహిస్తామని వారు హెచ్చరించారు. కాగా, ఈ ఘటనపై విద్యుత్ శాఖ అధికారులు స్పందిస్తూ, ప్రభుత్వ ఆస్తికి నష్టం కలిగించినందుకు ప్రమాదానికి కారణమైనందుకు మట్టి దందా నిర్వాహకులపై పోలీస్ స్టేషన్లో ఫిర్యాదు చేశారు.